اذا كنت تفكر في دخول السوق الحجازي فيجب أن تقرأ هذا المقال أولًا
في البداية لابد أن تعرف عزيزي التاجر كيف يفكر المستهلك الحجازي قبل الشراء وما هي دوافعه للشراء منك.
الصدمة اني أقولك المستهلك الحجازي لا يميل للتجديد يفضل أن يستمر مع نفس المتجر إلي يتعامل معاه من سنوات!
وأول سؤال راح يسأله نفسه لما يشوف اعلانك
انا ليش اشتري منه وأسيب إلي دائمًا اتعامل معاه ؟
المعلومة الثانية الي ضروري تعرفها عن المستهلك الحجازي
ما يشتري عشان خاطر فلان أو من طرف فلان أو بتوصية فلان
ما عنده المجاملات في الفلوس للأمانة
العكس في الرياض تلاقي العميل يثق اذا كان في توصية أو تجربة من شخص يحبه أو يثق فيه
لكن في الحجاز هذا مو سبب كافي للشراء.
ولا يقتنع بسياسة رجعت المنتج واسترجع فلوسك اذا ما ناسبك
المستهلك الحجازي صعب جدًا في ناحية الدفع اعتقد بسبب انه اغلب المجتمع من الطبقة المتوسطة والأقل
⁃ يسأل نفسه اكثر من مره قبل الشراء هل أنا فعلًا احتاج هذا المنتج ؟ هل يستحق ادفع فيه هذا المبلغ ؟
وفي الغالب الاجابة لا.
ولو صدف وشاف نفس منتجك ولكن ارخص بفرق واضح مراح يتردد في الشراء !
أول ما يهم المستهلك الحجازي هوا السعر
يبحث عن الأرخص في اي مجال
وكالة سفر وسياحة مين الارخص ؟
مطاعم مين الارخص ؟
شنط وملابس مين فيهم الارخص ؟
أثاث مين الارخص ؟
مستوى الجودة الي يتطلع ليه متوسط أو أعلى قليلًا إن وجد.
اذًا نتفق انو المستهلك الحجازي يميل للسعر بدلًا من الجودة إلا في بعض الحالات زي مثلا العسل والبخور .. الخ
حتى في الماركات!
تلاقي الضغط عندنا على الماركات الأقل تكلفة مقارنة بالماركات الثانية المتوسطة والمرتفعة.
وأيضا تجد اهتمام كبير من هذه الماركات في الحجاز عن باقي المناطق.
لذلك انصحك أيها التاجر المتحمس لاستهداف السوق الحجازي
إذا كانت ميزانيتك التسويقية بسيطة
تتوجه لسوق يميل المستهلك فيه للتجديد والتغيير وسهل اقناع مستهلكيه ويتفاعل أكثر مع توصية الأقارب والاصدقاء.
طيب ايش المجال الي يدفع فيه المستهلك الحجازي بدون ما يفكر؟
الملابس جودة متوسطة مع سعر مناسب
المطاعم والمقاهي بمختلف المجالات ولازم السعر يكون منطقي بالنسبة ليه
لا أعمم طبعًا ولكن هذا السائد على الأكثر وتجارب التجار تشهد.