عمرك سألت نفسك إيش النص الإعلاني المناسب للفئة العمرية من 18 إلى 30 سنة من النساء ؟
لنفرض انك تمتلك متجر اكسسوارات نسائية
لو جيت وسألت نفسك
كيف استهدف عميلاتي إلي المفترض أعمارهم من
18 سنة إلى 30 سنة ؟؟
حا تواجه قدامك اكثر من سؤال لابد انك تجاوب عليهم أول عشان تعرف كيف تصيغ اعلانك المحفز للشراء
السؤال الأول:
- ليش العميلة راح تشتري من عندي؟
- كم متوسط دخلهم المادي؟
- ايش اهتماماتهم ؟
- الموديلات المناسبة لهم؟
- يهمهم السعر أو الجودة ؟
- مدى اهتمام العميلة بالبكجينق
لو جينا فصلنا كل سؤال وجوابنا عليه جواب شافي حا يكون كالتالي:
السؤال الأول: ليش العميلة راح تشتري من عندي من بين كل المتاجر ؟
بعد تجارب واخفاقات عديدة اكتشف أن المتجر إلي ما عنده رسالة ما يقدر يبيع وما اقصد بكلامي الرسائل الي يكتبوها الشركات مع الرؤية والاهداف لا
الرسالة إلي اقصدها صريحة وواضحة و يلاقيها العميل في كل منشور وفي كل تصميم للمتجر .
لنفرض انك تمتلك متجر اكسسوارات نسائية أو متجر متخصص في المنتجات الكورية
عندك اكثر من رسالة ممكن توجها للفئة المستهدفة منها :
- تقدري تكوني انيقة وجميلة بمجوهراتنا وبسعر في متناول الجميع
لو تستهدف الفئة الي يهمها السعر ذكرهم دائما أن اسعارك هيا الأفضل وانهم يقدروا يكونوا انيقين بأقل التكاليف وانو جودتك تتغلب على سعرك
- ممكن تكون رسالتك انك متخصص في الهدايا سواء للصديقات أو المرتبطين وتذكر العملاء بهذي الرسالة مع كل منشور وفي هيدر حسابك لو كان على تويتر وفي الهايلايت لو كان في انستجرام
(الحقيقة الي ما يدركها اغلب التجار انو احنا الي نوجه عميلنا وندفعه للاجراء الي نبغاه بناء على رسائلنا المباشرة والغير مباشرة)
احنا الي نبني في ذهن عميلنا الصورة الي نبغاه يعرفها ويحفظها عن البراند مو العكس
بدليل فلاورد الي رسخت في ذهن عملاءهم انهم أول خيار للاهداء لو كانت الهدية ورد!
يعني عزيزي التاجر الالكتروني الكورة في ملعبك.
- والرسائل ما تقتصر على الي ذكرته تقدر ترسل للعميل الرسالة الي تبغاها وتثبتها في ذهنه طول العمر.
لو جينا للسؤال الثاني :
كم متوسط الدخل المادي لعملاءك المستهدفين ؟
هدي النقطة حساسة جدًا وممكن تنجح مشروعك أو تخسره
كل ما صغر عمر عميلك اتأكد انه يبحث عن السعر والترند اكثر من الجودة لان هذي قدرته المادية وهذي نظرته للامور في بداية حياته.
ما يهم البنات اذا كان المنتج الكوري اصلي أو لا كل الي يهمهم انهم يقتنوه ويكون سعره في متناول اليد
لذلك ممكن تشوف متاجر كورية تخسر او ما تحقق المبيعات المرجوة رغم ان المنتج اصلي 100%
والسعر يعتبر متوسط
لكن الحقيقة ان الفئة المستهدفة يهمها السعر قبل الجودة في هذا المجال.
والعكس تمامًا لو كان عميلك مهتم بالجودة والتغليف وما اهتميت فيهم عشان تعطيه سعر اقل صدقني محا يتعامل معاك ثاني !
أتذكر كل ما قلت جودة المنتج اصبح يستهدف عمل يهتم للسعر أولاً
واتذكر كمان أن كل ما ارتفعت اسعارك حصلت على عميل جيد ومريح وقد يكون مستمر
اما بخصوص السؤال الثالث والي هوا ايش اهتمامات عملاءك:
لازم تعرف انو مهم تكون فاهم تفكير عميلك
من اهتمامات واحتياجات ووضع مادي
و الوقت الي يفكر في بشراء منتجك
وهذي الأجوبة بعضها يجي من الخبرة والتجربة ومن مراقبة المنافسين
واتذكر كل ما عرفت اكثر عن عميلك المستهدف
كل ما قدرت توصله اسرع وتوفر فلوس أكثر وكمان تقنعه بسهوله!
ولكن مهم يكون عندك معلومات قبل ما توفر المنتج وتدخل السوق
قد ما تقدر والباقي راح يجي مع التجربة
التجربة هي الي تبني الخبرة بدون التجربة ما راح تتعلم ولا تفهم عميلك صح
بعض التجار يذهلني قد ايش هوا فاهم عميله وتفكيره وليش يبغى يشتري منه وكم اعلى مبلغ ممكن يدفعه ولكن ما وصلوا لهذي النتيجة الا بعد تجارب واحتكاك مع العملاء ومعرفة طلباتهم واحتياجاتهم وتلبيتها
عشان يستمروا في السوق
العميل هوا سبب استمرارنا في السوق
بعض العملاء يكون جاهز فورًا لشراء منتجك ممكن من أول اعلان
ونسبتهم في الغالب ما تتجاوز 3% من عدد الناس الي وصلهم اعلانك
والي يساعدهم على اتخاذ هذا القرار هوا انو منتجك مهم بالنسبة لهم يعني جزء من اهتماماتهم.
ومن مميزات هذا النوع من العملاء يتأثر وتفاعل مع أي اعلان لك ويتابعك بحرص هذا عميلنا المفضل هههههه
دائمًا راح تلاقي تشابه بين عملاءك في الاعمار والوضع المادي
مثال على الاهتمامات:
بعض البنات لازم تشتري منتجات عناية بالبشرة والشعر بشكل شهري
هذا الموضوع من أولوياتها
وميزة هذا النوع يكون عميل دائم ويشتري منك سواء كان في عروض او لا وما يحتاج تحفيز وإقناع من احد عشان يشتري من متجرك و بالعكس ممكن يكون افضل مسوق لك لو حب تعاملك واسعارك وخدمة ما بعد البيع عندك
هذا النوع من العملاء هوا المسؤل عن 80% من دخل أي مشروع
نصيحتي لك
حافظ عليه واسعى دائمًا لارضاءه
هذا العميل الي يقال عنه العميل دائمًا على حق.
والبعض الثاني تشتري من فترة لفترة أو لما تحس انها محتاجة تهتم ببشرتها
يعني اهتمامها بمنتجك متوسط ويعتمد على عوامل وأسباب تحفزها للشراء
من ضمنها :
- الحاجة لمنتجك
- العروض والخصومات
- تحفيز من الأصدقاء والاقارب
- رغبة بتجربة منتج جديد وعليه مدح ( ترند)
والطريقة الصحيحة للتعامل مع هذا النوع من العملاء
هوا التذكير المستمر بالمتجر والمنتجات بطريقة غير مزعجة
اما النوع الثالث وهو الغير مهتم:
والي ممكن يشتري منك مره أو مرتين في حياته مو عشان منتجك سيء
لا عشان هوا مو مهتم ولا من أولوياته منتجاتك أو اسعارك ما ناسبته
أو مهتم لشركات ثانية انت ما توفرها وممكن يكون ما عجبه تعاملك معاه كمتجر .
اقوى محفز لهذا النوع من العملاء
العروض والخصومات
كثرة مشاهدة اعلاناتك.
يتبع في المقال الثاني ..